Elok ranahnyo Minangkabau, rupo karambia tinggi-tinggi,
cando pinangnyo linggayuaran,
rupo rumpuiknyo gatia-gatialan,
Gunuang Marapi jo Singgalang,Tandikek jo Gunuang Sago,
Pasaman jo Gunuang Talang…
Nan bagunuang babukik-bukik,nan bahutan barimbo labek,
nan babukik baguo batu,nan bangarai balurah dalam,
nan badanau aia mangalia,nan batasik bapayau-payau…
Sasukek duo baleh taia,dicupak mangko digantang,
nan lunak ditanam baniah,nan kareh dibuek ladang,
nan bancah palapeh itiak,ganangan katabek ikan,
bukik batu ka tambang ameh,tambang timbago dengan perak,
tambang batubaro dengan minyak,
batanam nan bapucuak,mamaliharo nan banyao…
Sawahnyo batumpak-tumpak,ladang babidang-bidang,
sawah batumpak di nan data,ladang babidang di nan lereng,
banda baliku turun bukik,cancang latiah niniak moyang,
tambilang basi rang tuo-tuo,sawah lah sudah jo lantaknyo,
ladang lah sudah jo ranjinyo…
Luhak diagiah bapanghulu,nagari baampek suku,
dalam suku babuah paruik,kampuang diagiah batuo,
rumah dibari batungganai…
Nagarinyo bapaga dengan undang,
kampuang bapaga dengan buek…
Nan basasok bajarami,bapandam bapakuburan,
balabuah batapian,bakorong bakampuang,
barumah batanggo,basawah baladang,babalai bamusajik…
Adatnyo basandi syarak,syarak basandi Kitabullah,
syarak mangato adat mamakai, adat kawi syaraknyo lazim.
pasia aluih bak dipimpiang, batu bulek susun-basusun,
pudiang ameh batimba jalan, salo manyalo pudiang itam,
limau manih pautan kudo, kamuniang sandaran lalu,
aia janiah titian batu, nan jauah buliah dituruik,
nan dakek buliah dijalang…
Rumah gadang sambilan ruang,
nan salanja kudo balari,nan salitak kuciang malompek,
sandi banamo alau adat,tonggak banamo kasandaran,
pancuang turang alang katabang,cucuran labah mangirok,
gonjong rabuang mambasuik,paran gamba ula ngiang,
baukia bamego-mego,ukia banamo batang padi,
kaluak paku kacang balimbiang,
batatah dengan aia ameh, salo manyalo aia perak…
lantainyo data balantai papan licin balantai kulik,
ka ujuang surambi papek, ka tangah rajo babandiang,
tapatan undang sangkutan pusako,
tampaik maniru manuladan…
Nan bajanjang naiak batanggo turun,
naiak dari janjang nan di bawah,
turun dari tanggo nan di ateh,
kok raso di baok naiak, pareso dibaok turun,
mamakai malu dengan sopan, sarato raso jo pareso,
ereng dengan gendeng, untuak bahanggo dengan tanggo…
Kok barek samo dipikua, ringan samo dijinjiang,
nan ado samo dimakan, nan indak samo dicari,
tatungkuik samo makan tanah,
tatilantang samo minun ambun…
Rangkiang baririk di halaman, nan ditangah Sibayau-bayau,
nan dikida Lumbuang Baperong, nan disuok Sitinjau Lauik,
lah sudah untuak katigonyo…
Nan banamo Sibayau-bayau, guno padinyo,
untuak makanan rumah jo tanggo,
kapanuruik alua nan luruih,ka panampuah jalan nan pasa,
tumbuah di adat ka diisi,jokok limbago dituangi…
Nan banamo Lumbuang Baperong,
kapanenggang korong jo kampuang, kok tabao di maso sulik,
nan senteng patuik dibilai, nan kurang patuik ditukuak,
nan singkek dapek diuleh…Nan banamo Sitinjau Lauik,
kapanyapo dagang lalu, pananti tamu datang,
kok lapa dibari nasi,jikok auih diagiah aia,
banamo adat sopan santun.
